Uppliv serstaku útgávukonsertina hjá Jósefi Zachariassen í Fugloy!

Tann 13. septembur bjóðar Jósef føroyingum til Fugloy at uppliva heildarútgávuna, sum hann hevur skrivað og upptikið á oynni. Konsertin er serlig á tann hátt, at hon er ein heildagsferð, sum Jósef vónar at føroyingar vilja taka við honum.
Konsertin verður hildin í vøkru kirkjuni í Fugloy, har Jósef fer at leiða okkum gjøgnum sína ferð í Fugloy.

G.G. Ferðaseðil við bátinum fylgir við í atgongumerkinum til konsertina.

Skráin fyri dagin ljóðar soleiðis:
kl.14.45 Báturin siglur frá Hvannasund til Fugloy (Møtið í Hvannasun í góðari tíð!)
Skipa verður fyri einum gongutúri í Fugloy, sum øll kunnu luttaka á

kl.16.30 Útgávukonsert í kirkjuni
kl.18.00 Kafé - tilber at keypa sær drekkamunn og okkurt at eta á kafé hjá Amaliu
kl. 19.15 Báturin siglur aftur til Hvannasund

Í 2022 fekk Jósef nokk av býarlívinum í Oslo, Noreg og flutti tí til eini gomul familjuhús í Fugloy. Har fekk hann frið at vera til, skriva tónleik og granska seg sjálvan. Jósef fann stóran íblástur í Fugloy - serliga í náttúruni, kirkjuni, kvirruni, og søgunum, honum bleiv fortalt.

Hann skrivaði nógvan tónleik og tekstir, sum hann síðani hevur brúkt 2 ár upp á at arrangera, innspæla og miksa.

Úrslitið er ein heildarútgáva við heitinum ”Fugloy” sum kemur út á allar talgildar stroymitænastur 13. septembur, ígjøgnum Plátufelagið Tutl. Sama dag kemur Jósef heim til Føroya við bólki, at framføra útgávuna fyri fyrstu ferð!

Við í bólkinum eru:
Jósef Zachariassen - Sang og tangentar
Håkon Brunborg Kjenstad - Bratsj og tangentar
Torjus Gravir Klykken - Bass
Amund Kleppan - Trummur